في السماء يا شهيد

فى السما يا شهيد نورلى شمعة
يللى عايش وسط التسابيح..اناحاسة انى سامعة
و طبب جراحك المسيح ومسح عنك كل دمعة
انا خلاص عارفة انت فين..ولأحزانى تانى مش راجعة

......ازاى احزن وانت هناك؟؟
فى حضن ابوك اللى فداك
ياابنى انا مش ممكن هنساك
بس انا نفسى تزورنى حتى فمنامى والقاك
دانا دايما ماسكة صورتك يا اجمل ملاك
بس مش هبكى عليك.. لتكون دموعى مزعلاك
تعالى يا حبيبى ارجوك زورنى ..امك مستنياك

وصليلى الشيطان يبعد عنى
عشان كل ليلة بيحاول يألمنى
وبيقولى انك اخدوك منى
بس متخافش ..وعد يسوع دايما مطمنى
ومحسسنى انك مش غايب وفحضنى
لكن ارجوك امام العرش اذكرنى
اطلب مالفادى على غيابك يصبرنى
ربنا معاك وانت معاه يا ابنى
كلمات:شاعرة الشهداء
الشاعرة :ناهد فاروق